Yondani ampa ujumbe mzito Pluijm

BEKI kisiki ‘roho’ ya Yanga, Kelvin Yondani amekiangalia kwa umakini kikosi cha Al Ahly na kubaini  kiungo wa miamba hiyo ya Misri, Ramadan Sobhy, ni mchezaji hatari zaidi kwa upande wao kuelekea katika pambano lao litakalopigwa Jumamosi ijayo katika Uwanja wa Taifa, Dar es Salaam iwapo kocha wao, Hans van der Pluijm hatashtuka mapema.

Kwa kufahamu hilo, Yondani amemtaka Pluijm na benchi lake la ufundi kuchukua hatua za haraka kuhakikisha anaipa mbinu za kutosha safu yao ya ulinzi kabla ya kuwavaa mabingwa hao wa kihistoria wa Afrika.

Kati ya mambo amabyo beki huyo amemuasa kocha wao kuyafanyian kazi, ni kusisitiza kubadilika kiuchezaji kwa baadhi ya wachezaji wao, hasa kuongeza umakini na kuepuka kufanya makosa ambayo aynaweza kuwaponza na kujikuta wakipigwa mvua ya mabao siku hiyo.

“Tumewaona Al Ahly ni timu nzuri, lakini wana mtu anaitwa Sobhy, kwa upande wetu mtu huyu ni hatari zaidi, anajua sana na nina imani tusipokuwa makini, anaweza kutusumbua, hivyo kunahitaji mbinu za ziada katika kumdhibti,” alisema.

Yondani amelipsaha BINGWA kuwa Sobhy anayevaa jezi namba 27, ni fundi wa kufunga, huku pia akiwa ni mtundu wa kupiga chenga za maudhi na kukaa na mpira, hivyo anapaswa kupewa ulinzi wa ziada.

Mkali huyo ambaye kwa sasa ndiye tegemeo katika kikosi cha Yanga, alisema kiungo wao mkabaji, Pato Ngonyani, ana mapungufu machache ambayo yanaweza kurekebishika na akacheza vizuri siku hiyo hivyo kuwapunguzia mabeki kazi ya kukaba.

Alisema kuwa iwapo Ngonyani hatakuwa makini katika kuhakikisha ‘anamalizana’ na Sobhy au hata El Said Abdallah ambaye naye ni moto wa kuotea mbali, hali inaweza kuwa mbaya zaidi kwao, kwani watakuwa wakimwekea ulinzi mkali mshambuliaji hatari wa mabingwa hao wa Misri, Malick Evouna raia wa Gabon.

Katika siku za hivi karibuni katika michezo kadhaa ya Ligi Kuu Tanzania Bara, Kombe la F.A na ya Kimataifa, Pluijm amekuwa akimchezesha Ngonyani katika nafasi ya kiungo mkabaji badala ya Mbuyu Twite.

Pamoja na kupewa nafasi hiyo, bado Ngonyani amekuwa akishindwa kuimudu vyema nafasi hiyo, hivyo kuwafanya mabeki wake wa kati, Yondani na Vincent Bossou kujikuta katika mshike mshike mara kwa mara.

Kati ya kasoro alizonazo Ngonyani, ni uzito wa maamuzi, kupandisha timu, kuwasaidia mabeki wa pembeni wawapo na mpira, lakini pia wepezi wa kumwezesha kumudu kunyambulika (flexibility) kwendana na kasi ya mchezo, zaidi ikiwa ni washambuliaji wepesi na wajanja wanaposaka mabao.

Mathalani katika mchezo wa juzi wa Kombe la FA kati ya Yanga na Ndanda, Ngonyani alishindwa kukabiliana na washambuliaji wa wapinzani wao hao, wakiongozwa na Atupele Green na nahodha wao, Kiggi Makasy, hivyo Pluijm kuamua kumtoa na kumwingiza ‘fundi’ Salumj Telela.

Kuingia kwa Telela kulionekana kuongeza uhai katika safu ya kiungo ya Yanga ambapo mkali huyo alionyesha kiwango cha hali ya juu, akishirikiana vena na Thaban Kamusoko na hivyo kuwakosha vilivyo mashabiki wa timu yao waliojitokeza uwanjani hapo, wakiwamo wale waliokuwa wakiufuatilia mchezo huo kupitia runinga zao.

Ni kwa kufahamu hilo, Yondani anadhani Ngonyani anatakiwa kubadili aina yake ya uchezaji ili kuendana na kasi ya wachezaji wa Al Ahly ambao wengi wao ni wazoefu wa michuano ya kimataifa, lakini pia wakiwa na kasi na nguvu, lakini akionekana ‘kumtupia mpira’ Pluijm ambaye ndiye mwamuzi wa mwisho katika suala zima la kupanga kikosi.

Hivyo, mkali huyo ambaye mashabiki wa Yanga wamempachika jina la Vidic, wakimfananisha kiuchezaji na beki wa zamani wa Manchester United, Nemanja Vidic, amesema iwapo Pluijm atashiondwa kurekebisha kasoro zilizopo ndani ya kikosi chao, zaidi ikiwa ni umakini wa viungo wao, asije kushangaa wakipigwa mabao ya kumwaga.

Mara ya mwisho timu hizo mbili zilikutana Machi 2014 ambapo walipambana kwenye mechi ya hatua ya kwanza ya Ligi ya Mabingwa Afrika na miamba hiyo ya Misri ilifanikiwa kusonga mbele kwa ushindi wa changamoto ya mikwaju ya penalti 4-3 baada ya kila timu kushinda bao 1-0 kwenye uwanja wake wa nyumbani.

Mbali ya Sobhy na Abdallah, wakali wengine wa Al Ahly wanaotarajiwa kuivaa Yanga wiki ijayo ni John Antwi, Hossam Ghaly na wengineo waliopo katika kikosi cha timu ya Taifa ya Misri.

Bingwa