Nigeria yafanya maandamano ya kumuunga mkono Sheikh Zakzaky

Wananchi wa Nigeria wamefanya maandamano kulalamikia kuendelea kuwekwa korokoroni kiongozi wa Harakati ya Kiislamu ya nchi hiyo.

Sheikh Ibrahim Zakzaky anaendelea kushikiliwa mahali pasipojulikana huko Nigeria bila ya kushtakiwa licha ya kupita zaidi ya miezi mitatu sasa tangu atiwe mbaroni. Wakazi wa mji wa Zaria katika jimbo la Kaduna kaskazini mwa Nigeria jana waliandamana kulalamikia kuendelea kuzuiliwa korokoroni Sheikh Ibrahim Zakzaky Kiongozi wa Harakati ya Kiislamu ya Nigeria, huku wakiwa wamebeba mabango na kupiga nara zinazosema "Muachieni huru Sheikh Zakzaky."

Kwa mujibu wa ripoti hiyo, maandamano hayo yamefanyika huku Harakati ya Kiislamu ya Nigeria ikikanusha madai kuwa wanachama wa harakati hiyo wiki iliyopita walimteka nyara kanali mmoja wa jeshi na kumuua.

Vikosi vya jeshi la Nigeria mwezi Disemba mwaka jana viliishambulia nyumba ya Sheikh Ibrahim Zakzaky katika mji wa Zaria jimboni Kaduna na husseiniya kadhaa nchini humo, na kisha kumjeruhi na kumtia nguvuni kiongozi huyo wa kidini na kuua pia idadi kubwa ya Waislamu wa mji huo.

Harakati ya Kiislamu ya Nigeria imetangaza kuwa watu zaidi ya 12 waliotiwa mbaroni kwenye mashambulizi ya jeshi la Nigeria, hadi sasa hawajapata huduma za kitiba licha ya kujeruhiwa vikali katika mashambulizi hayo. Wiki iliyopita pia wananchi wa Nigeria walifanya maandamano katika miji mbalimbali ya nchi hiyo na kulaani kuendelea kushikiliwa Sheikh Ibrahim Zakzaky Kiongozi wa Harakati ya Kiislamu ya nchi hiyo. Wafanya maandamano katika miji ya Lafia, Katsina, Gombe na Kaduna wametaka kuachiwa huru haraka iwezekanavyo Sheikh Zakzaky na Waislamu wengine ambao wanashikiliwa katika korokoro za jeshi la Nigeria. Baada ya kupita miezi kadhaa tangu Sheikh Zakzaky atiwe nguvuni na jeshi la Nigeria, hatimaye shakhsia mmoja aliye karibu na Kiongozi huyo wa Harakati ya Kiislamu wiki kadhaa zilizopita alifanikiwa kuonana na Sheikh Zakzaky na mkewe.

Mtu huyo aliye karibu na Sheikh Zakzaky alisema kuwa, hali ya mke wa kiongozi huyo imeboreka japokuwa wameshindwa kutoa mwilini mwake risasi moja kwa kuhofia kuwa huenda likamfanya kuwa kilema.

Shakhsiya huyo aliye karibu na Sheikh Zakzaky ameongeza kusema kuwa, Sheikh Ibrahim Zakzaky naye pia anaendelea kupata matibabu, ingawa kwa bahati mbaya jicho lake moja limepoteza kabisa uwezo wa kuona na jingine pia kupoteza uwezo mkubwa wa kuona.

Duru hiyo imeendelea kubainisha kuwa, Sheikh Zakzaky ameanza kutembea kwa taabu hivi karibuni tu kutokana na kujeruhiwa vikali na vikosi vya Nigeria, lakini pamoja na nayo, yeye na mkewe wanaonekana kuwa na motisha ya hali ya juu.

Baada ya kufanyika ziara hiyo, viongozi wa Nigeria waliizuia timu ya uchunguzi ya Harakati ya Kiislamu ya nchi hiyo kuonana na kiongozi wao, na kwa msingi huo harakati hiyo nayo ikaamua kutohudhuria mahakamani.

Timu ya kisheria ya Harakati ya Kiislamu ya Nigeria imeitaja hatua ya kunyimwa kibali cha kuonana na Sheikh Zakzaky ambaye anashikiliwa katika seli za jeshi la nchi hiyo kuwa ni kitendo kisicho cha kiakhlaqi na kilicho kinyume na maadili.

Katika upande mwingine, Kamisheni ya Haki za Binadamu ya Kiislamu ya Uingereza wiki iliyopita ilitoa taarifa na kueleza kuwa, imewasilisha katika mahakama ya ICC ya The Hague faili la kesi ya kushambuliwa nyumba ya Sheikh Ibrahim Zakzaky na vikosi vya usalama vya Nigeria.

Taarifa hiyo imesisitiza kuwa, uhalifu uliofanywa na jeshi la Nigeria katika kipindi cha tarehe 12 hadi 14 Disemba katika mji wa Zaria dhidi ya Waisalmu ni jinai dhidi ya binadamu na kuna udharura wa kutolewa amri ya uchunguzi wa mahakama ya ICC kuhusu uhalifu huo. Kamisheni ya Haki za Binadamu ya Kiislamu ya Uingereza imesisitiza kuwa ushahidi uliopo unaonyesha kuwa, shambulio hilo dhidi ya Kiongozi wa Harakati ya Kiislamu ya Nigeria ambalo limeweza kuwavutia wafuasi wengi kaskazini mwa nchi hiyo, lilikuwa ni shambulizi lililopangwa.

Masoud Shajare Mkuu wa Kamisheni ya Haki za Binadamu ya Kiislamu ya Uingereza amesema kuwa taathira kubwa za jinai hizo na kushindwa serikali kufuatilia kisheria kadhia hiyo, yote hayo yanatoa udharura wa kufuatiliwa mwenendo wa kesi hiyo katika Mahakama ya Kimataifa. 

Iran swahili