Vigogo Yanga wampandia Maguli

YANGA wanatarajia kukamilisha usajili wa dirisha dogo la Ligi Kuu Tanzania Bara na michuano ya kimataifa baada ya kumalizika kwa michuano ya Kombe la Chalenji inayoendelea mjini Addis Ababa, Ethiopia.

Viongozi wa Yanga na benchi la ufundi la timu hiyo kwa sasa wako makini sana kuhakikisha wanapata wachezaji makini wa kuongeza nguvu kwenye kikosi chao ili kuhakikisha wanafanya maajabu katika michuano inayoendelea hasa ile ya kimataifa itakayoanza hapo mwakani.

Maguli na Canavaro

 

Kutokana na hali hiyo zoezi la usajili kwenye klabu hiyo ya Jangwani limekuwa likifanyika kwa umakini mno, hasa katika kipindi hiki cha dirisha dogo na ndiyo maana hadi sasa bado hawajaweka wazi mipango yao ya usajili.

Chanzo cha kuaminika kimeliambia BINGWA kwamba tayari viongozi wa Yanga wanasuka mipango ya kuvamia Ethiopia kuangalia nani anaweza kufiti kuingia kwenye kikosi chao, lakini pamoja na hivyo wanakwenda na jina la mshambuliaji wa Stand United, Elias Maguli kwa lengo la kuangalia kama ataendelea kuwa katika kiwango chake ili wamalizane naye.

Maguli ambaye jana alidhihirisha kwamba yuko vizuri kwa kupachika  mabao mawili kati ya manne yaliyoiwezesha timu ya Taifa ya Tanzania Bara, Kilimanjaro Stars kuibuka na ushindi mnono wa mabao 4-0 dhidi ya Somalia.

Maguli ameanza kuwindwa na klabu mbalimbali baada ya kuonyesha uwezo wa hali ya juu kwenye michuano ya Ligi Kuu na mechi mbili za kuwania kufuzu fainali za Kombe la Dunia mwaka 2018, alipoifunga bao Taifa Stars dhidi ya Algeria wakati walipotoka sare ya mabao 2-2 katika mchezo wa kwanza uliochezwa Novemba 14 mwaka huu, Uwanja wa Taifa jijini Dar es Salaam.

Alifunga bao ugenini na kukataliwa na mwamuzi katika mchezo wa pili uliochezwa Algeria na wenyeji hao kuibuka na ushindi wa mabao 7-0.

Kutokana na kiwango kilichoonyeshwa na mshambuliaji huyo ambaye kwa sasa anaongoza kwa ufungaji katika Ligi Kuu Bara baada ya kufunga mabao tisa, imeelezwa Yanga wamemfungia safari hadi Ethiopia.

BINGWA limeelezwa kwamba baadhi ya vigogo wanataria kusafiri ndani ya wiki hii, ambapo pamoja na Maguli pia watakuwa na kazi maalumu ya kuangalia wachezaji wengine muhimu kwa mujibu wa mahitaji ya kocha.

“Ni kweli kuna watu watasafiri kwenda Ethiopia na huko watakuwa na kazi maalumu ya kuangalia wachezaji, si lazima wale ambao tutawasajili hivi sasa lakini pia kuweza tu kutambua nani anaweza kutufaa hata kwa baadaye,” alisema mtoa habari wetu.

Pamoja na Maguli kuhusishwa na Yanga kwenye usajili huo, klabu nyingine inayotajwa kuwania saini yake ni TP Mazembe ya Jamhuri ya Kidemokrasia ya Congo (DRC).

Habari zilizolifikia gazeti la BINGWA zinaeleza kwamba, wajumbe kutoka DRC wametua nchini kwa lengo la kumalizana na Maguli baada ya kuridhika na kiwango alichokionyesha kwenye timu ya Taifa Stars na klabu yake.

Akizungumza na BINGWA kutoka Ethiopia, Maguli alisema anatarajia kuweka wazi mpango baada ya kukamilika kwa usajili wake katika klabu inayomhitaji.

Maguli alisema kwa sasa suala zima litabaki kama lilivyo, lakini ataweka kila kitu wazi baada ya kukamilika kwa dili lake.

“Kila mtu anasema lake mara naenda huku mara kule, lakini ukweli naujua mimi mwenyewe, kwa sasa ni mchezaji wa Stand kama kutakuwa na timu naenda kuitumikia nje ya hiyo nitaweka wazi mpango mzima hadharani,” alisema Maguli.

Maguli akiri kuhitajika na klabu mbalimbali lakini alisema ni mapema kuzitaja kutokana na kwamba wanaendelea na mazungumzo na klabu hizo.- Chanzo kwa hisani ya Bingwa.