Read, Rotary wazipiga jeki shule ya msingi Msasani A&B

SHIRIKA lisilo la kiserikali la Read International kwa kushirikiana na Chama cha Wafanyabiashara wanaojitolea katika kusaidia jamii (Rotary), wamekabidhi maktaba kwenye shule mbili za Msasani A na B jijini Dar es Salaam kwa lengo la kuinua kiwango cha elimu shuleni hapo.

Akizungumza wakati wa uzinduzi wa maktaba hizo shuleni hapo, Mkurugenzi wa Read International, Montse Pejuan, alisema lengo la maktaba hizo ni kutaka kusaidiana na Serikali ili kuinua kiwango cha elimu nchini kwani Serikali peke yake haiwezi kufanya kila kitu.

“Kwa sasa kuna sera ya Matokeo Makubwa Sasa (BRN) hivyo bila kushirikiana pamoja na Serikali kamwe hatuwezi kufikia malengo ya sera hiyo ndio maana tumekuwa tukijaribu kusaidia pale tunapoweza kwa kushirikiana na wadau mbalimbali wa maendeleo, lengo likiwa ni katika kuhakikisha kuwa shule zote zinakuwa na maktaba nchini,” alisema Pejuan.

Naye Rais wa Rotary Club of Dar Osterbay, Mohamed Versi, alisema hutoa misaada mbalimbali kwa jamii hivyo walijitolea kwa moyo mmoja kuhakikisha wanashirikiana na Read ili kuwezesha shule hizo kupata maktaba kwani pia ziko kwenye mazingira yanayowazunguka.

“Sisi kama Rotary huu ni mpango wetu wa kwanza kati ya tisa tuliyojiwekea katika kuhakikisha kuwa tunasaidia jamii ya Watanzania kwenye nyanja mbalimbali za elimu, afya na maji, hivyo chochote tunachokipata tumekuwa tukikifikisha kwa walengwa moja kwa moja kupitia mahitaji mbalimbali,” alisema Versi.

Kwa upande wake, Mwalimu Mkuu wa Shule ya Msingi Msasani B, Egidious Mjunangoma, alisema msaada huo wa maktaba utakuwa chachu ya kusaidia kuinua kiwango cha elimu na maendeleo ya kitaaluma kwa wanafunzi wa shule hizo.

Naye Jennifer Ruben wa Shule ya Msasani A, alisema awali walikuwa na vitabu kwenye stoo lakini hawakuwa na maktaba hivyo uwepo wa maktaba hiyo utasaidia wanafunzi kupata mwanya wa kuongeza maarifa zaidi.

Maktaba hizo pamoja na vitabu vimegharimu zaidi ya Sh milioni 16 za Tanzania.