Yanga yawapeleka Simba Msuva, Niyonzima

KLABU ya Yanga imesema kuwa haiumizwi kichwa na tetesi za watani wao wa jadi Simba kuwamendea wachezaji wao, Haruna Niyonzima na Simon Msuva kwani wana uwezo wa kuziba mapengo yao.

Mikataba ya Niyonzima na Msuva inatarajiwa kufikia tamati mwishoni mwa msimu huu na wamekuwa wakihusishwa na mpango wa kutua Simba.

Tayari Mwenyekiti wa Kamati ya Usajili Simba, Zacharua Hanspoppe, ameweka wazi kuwa lazima wamsajili Msuva kwani nyota huyo ana kila alichoita ‘damu ya Msimbazi’, yaani ni mpenzi wa klabu yao yenye maskani yake Mtaa wa Msimbazi.

Akizungumza Dar es Salaam , Mkuu wa Idara ya Habari na Mawasiliano wa Yanga, Jerry Muro, alisema Yanga ni klabu kubwa ambayo inafanya mambo yake kisasa ndiyo maana hawababaiki na uvumi huo, akiweka wazi kuwa wachezaji hao wana haki ya kuzungumza na timu yoyote.

“Yanga tunaendesha mambo yetu kitaalamu zaidi wala hatukurupuki kama wengine, lakini pia kwa habari ya kuzungumza na mchezaji, hata mimi naweza kufanya hivyo kwa yeyote, hivyo Simba kuzungumza na Msuva na Niyonzima wala halina presha kwetu.

“Kwa kipindi hiki akili yetu ipo kwenye kuutangaza ubingwa mapema na pia namna ya kuwakabili Etoile du Sahel, hivyo tunawaambia mashabiki wetu waelekeze akili zao huko, haya mengine wala yasiwatie wasiwasi,” alisema.

Juu ya suala zima la usajili, alisema hawawezi kukurupuka na badala yake wanasubiri mapendekezo ya kocha wao Van der Pluijm kujua nani anamtaka na nani hamuhitaji.

“Hatuwezi kufanya jambo ambalo hatujaambiwa na benchi letu la ufundi chini ya kocha wetu Hans kwani kufanya hivyo ni sawa na kumuingilia majukumu yake,” alisema.

Msuva ametokea kuwa mchezaji muhimu katika kikosi cha Yanga, akiwa anaongoza orodha ya wafungaji ambao katika mechi za Ligi Kuu Bara baada ya kufunga mabao 14.