Safari yamkuta Twite Yanga

BEKI wa Yanga mwenye uwezo wa kucheza nafasi nyingi, Mbuyu Twite amejikuta njiapanda ndani ya kikosi cha timu hiyo baada ya kutoa kauli iliyowakera viongozio wake.

Juzi Twite alitofautiana na Kocha Mkuu wa Yanga, Hans van der Pluijm baada ya Mholanzi huyo kumkoromea mchezaji wake kwa madai ya kuboronga katika mchezo wa siku hiyo dhidi ya Stand United kwenye Uwanja wa Taifa, Dar es Salaam.

Yanga walishinda mabao 3-2 na kuzidi kujichimbia kileleni katika msimamo wa Ligi Kuu Tanzania, lakini waliocheza chini ya kiwango, ikiwa ni pamoja na safu ya ulinzi iliyokuwa chini ya Twite kupoteana.

Hali hiyo, hasa kuruhusu kufungwa mabao mawili ilimkera mno Pluijm ambaye anaheshimika kwa soka la kushambulia, lakini pia akiwa na safu imara ya ulinzi.

Baada ya mchezo huo, Pluijm alimwita Twite na kumfokea hadharani akifanya hivyo pia kwa kipa Deogratius Munishi ‘Dida’.

 Kitendo hicho kilionekana kumuumiza Twite na kutishia kuondoka ndani ya kikosi cha timu hiyo kilichopo kambini kwenye Hoteli ya Tansoma, jijini.

Lakini Twite alifika mbali kwa kusema kuwa Yanga wanatakiwa kuchagua mawili, aidha kumtema Pluijm ili yeye aendelee kubaki, au aondoke yeye kocha huyo aendelee kupeta Jangwani.

“Kwanini anifokee hadharani mbele za watu wakati si mimi niliyefanya makosa? Siwezi kukubali, ni heri niondoke Yanga kocha abaki au aondoke yeye mimi nibaki,” alisema.

BINGWA lilimtafuta Mkuu wa Idara ya Habari na Mawasiliano ya Yanga, Jerry Muro kuzungumzia suala hilo ambapo alikana kuwapo kwa mgongano kati ya kocha wao na wachezaji hao.

“Hakuna walichokuwa wanagombana isipokuwa kocha alikuwa anamtania na kumuuliza maana juzi (Jumatatu) walinunuliwa vifaa vipya na kila mmoja alitakiwa kuwa navyo, lakini yeye (Twite) hakuja navyo ndiyo akamuuliza kwa utani kuwa aliviacha wapi,” alisema Muro.

Pamoja na utetezi huo wa Muro, BINGWA linatambua kuwa Twite atakuwa amelikoroga Yanga kutokana na kauli yake ‘ni heri niondoke Yanga kocha abaki au aondoke yeye mimi nibaki’, kutokana na ukweli kuwa Pluijm amekuwa kipenzi cha Wanayanga zaidi ya hata ilivyo kwa mchezaji yeyote yule wa timu hiyo.

Ni wazi ni suala la kusubiri na kuona kama si kusikia nini kitafuata baada ya kauli na msimamo huo wa Twite.

Lakini kwa hali ilivyo, iwapo Twite atazidi kuwa ngangari juu ya msimamo wake huo, huenda siku zake ndani ya Yanga zikafikia kikomo kwani ni wazi hakuna mtu yeyote ndani ya klabu hiyo atakayekuwa tayari kumuona Pluijm akiondoka Jangwani kwa sababu ya mchezaji kama Twite.