Okwi: Nina machungu na Azam

Mshambuliaji wa Simba, Emmanuel Okwi (jezi nyekundu) akiwapiga chenga wachezaji wa Mgambo Shooting  katika  mchezo wa Ligi Kuu Vodacom Tanzania Bara.Picha na Michael Matemanga

MSHAMBULIAJI wa kimataifa wa Simba, Mganda, Emmanuel Okwi anaisubiri kwa hamu Azam FC baada ya juzi kufunga hat-trick dhidi ya JKT Mgambo katika mchezo wa marudiano wa Ligi Kuu Tanzania Bara uliochezwa kwenye Uwanja wa Taifa, Dar es Salaam.

Katika mchezo huo ulichezwa kwenye uwanjani hapo, Simba walishinda mabao 4-0 na kufikisha pointi 38 wakiwa nyuma ya Yanga wenye pointi 49 na Azam FC (42).

Akizungumza na juzi, Okwi alisema ushindi huo ni salamu tosha kwa timu wanazotarajia kucheza nazo ikiwemo ya Azam ambao wanawania nao nafasi mbili za juu ili waweze kushiriki michuano ya kimataifa.

Okwi alisema kwa sasa akili yake ipo katika kuiwezesha timu yake kuvuna pointi tatu kwenye mechi zao zote tatu zilizobaki.

“Nafikiria kushinda michezo yote iliyobaki na baada ya hapo tutajua tutakuwa kwenye nafasi gani, kama ni ya pili au la,” alisema Okwi.

Pamoja na kutokwenda kiundani zaidi, Okwi anaonekana kuwa na hasira zaidi na Azam ambao katika mchezo wa mzunguko wa kwanza baina ya timu hizo, Mganda huyo alijikuta akiwa katika wakati mgumu baada ya kuchezewa rafu mbaya.

Beki wa kati wa Azam, Agrey Morris, ndiye aliyemchezea rafu hiyo kwa kumpiga kiwiko hali iliyomfanya mchezaji huyo kupoteza fahamu.

Kwa inavyoonekana, kitendo hicho kilimuuma mno Okwi hivyo kuona njia pekee ya kulipiza kisasi ni kuipiga mabao Azam watakapokutana nayo kama alivyowafanyia Mgambo JKT juzi kwa kuwafunga matatu peke yake katika ushindi wa 4-0.

Wakati Okwi akisema hayo, Kocha Mkuu wake, Goran Kopunovic alisema kihesabu Simba wanaweza kushika nafasi ya pili itakayofanya washiriki michuano ya Kombe la Shirikisho barani Afrika mwakani.

Kopunovic alisema lengo lake ni kutaka kuendelea kuifundisha timu hiyo, iwe kwenye kiwango cha juu na washinde michezo iliyosalia ingawa katika soka lolote linaweza kutokea.

Alisema wanajipanga katika kuhakikisha wanashinda mchezo unaofuata dhidi ya Ndanda FC utakaochezwa kesho kwenye Uwanja wa Taifa, Dar es Salaam.

Katika mchezo wa kwanza uliochezwa kwenye Uwanja wa Nangwanda Sijaona, Ndanda FC walipoteza kwa Simba baada ya kufungwa mabao 2-0.