yanga yaitunishia TP Mazembe kwa Ngassa

UONGOZI wa Yanga umeikata maini TP Mazembe ya Jamhuri ya Kidemokrasia ya Kongo (DRC) iliyoonyesha nia ya kumtwaa mshambuliaji wao hatari, Mrisho Ngassa, ikisema kamwe haiwezi kumwachia kirahisi nyota wao huyo.

Ngassa ni miongoni mwa wachezaji wa Yanga ambao mikataba yao inamalizika mwishoni mwa msimu huu na tayari mkali huyo alielezea azma yake ya kuondoka Jangwani baada ya kumalizika kwa mkataba wake.

Wakati wapenzi wa Yanga wakiwa njiapanda juu ya majaliwa ya nyota wao huyo iwapo ataendelea kuwa nao au la, uongozi wa wakongwe hao wa soka nchini umevunja ukimya kwa kuweka wazi kuwa wapo tayari kutoa kiasi chochote cha fedha kumbakisha mchezaji mwenye mchango mkubwa na timu yao wa kiwango cha Ngassa.

Kauli hiyo ilitolewa wiki iliyopita na Katibu Mkuu wa Yanga, Jonas Tiboroha, alipokuwa akizungumza na BINGWA juu ya majaliwa ya wachezaji wao wanaoelekea kumaliza mikataba yao akiwamo Ngassa.

Alisema wamejipanga kuhakikisha wanawabakiza wachezaji wao nyota, ikiwa ni pamoja na kuboresha baadhi ya vipengele kwenye mikataba yao kutokana na kutambua michango yao ndani ya timu.

Aliongeza wachezaji wote ambao wana msaada ndani ya Yanga, kamwe hawatapewa nafasi ya kuondoka kirahisi, hasa katika kipindi hiki ambacho mikakati yao ni kuzidi kutamba katika anga la kimataifa na michuano ya ndani pia.

“Hakuna mchezaji ambaye ana msaada kwa timu yetu tutamruhusu kuondoka hapa, wale wanaomaliza mikataba na ambao hawajamaliza hatuwezi kuwaruhusu wakaondoka kirahisi,” alisisitiza Tiboroha.

Alisema kwa sasa wanaangalia jinsi ya kuboresha mazingira ya wachezaji wao katika kila idara ili kuwawezesha kujituma zaidi na kuitumikia timu hiyo kwa uwezo na nguvu zao zote.

Alisisitiza wana mipango endelevu lukuki, zaidi ikiwa ni kutamba kimataifa, hivyo ili kuitimiza wanahitaji kuwa na kikosi kilichokaa pamoja kwa muda mrefu.

“Hakuna sababu ya wale wanaomaliza mikataba yao au waliobakiza muda mfupi kuanza kuzungumza kwenye vyombo vya habari, watulie mambo mazuri yanakuja, tumejipanga kuhakikisha wanafurahia maisha ndani ya Yanga,” aliongeza.

Baadhi ya wachezaji wa Yanga ambao mikataba yao imebakisha muda mfupi kumalizika ni Mbuyu Twite, Haruna Niyonzima, Deogratius Munishi ‘Dida’, Ngassa na Amissi Tambwe.

Hivi karibuni, Ngassa alisema anataka kuondoka Yanga kwani anahisi kutothaminiwa, japo baadaye aliibuka na kutaka dau la Sh milioni 100 ili aweze kubaki Jangwani.

Yanga kwa sasa ipo katika nafasi nzuri ya kutwaa ubingwa wa Ligi Kuu Tanzania Bara, kwani hadi sasa inaongoza ligi hiyo ikiwa na pointi 37 baada ya kucheza mechi 18, huku ikiwa imejiwekea mazingira mazuri ya kutinga raundi ya pili ya Kombe la Shirikisho Afrika baada ya kuichapa FC Platinum ya Zimbabwe mabao 5-1 katika mchezo wa kwanza.

Timu hizo zitarudiana Aprili 3, mwaka huu nchini Zimbabwe ambapo Yanga watatakiwa kushinda au kupata sare yoyote waweze kusonga mbele.

Wakati huo huo, mshambuliaji wa Yanga, Amissi Tambwe, ataukosa mchezo wa kesho dhidi ya JKT Ruvu kutokana na kutumikia adhabu ya kadi tatu za njano alizoonyeshwa kwenye michezo ya Ligi Kuu Tanzania Bara.

Yanga itashuka Uwanja wa Taifa, Dar es Salaam kesho kuwavaa JKT Ruvu, huku ikimkosa mfungaji wao huyo ambaye mwishoni mwa wiki iliyopita alifunga bao katika ushindi wa mabao 2-0 dhidi ya Mgambo JKT kwenye Uwanja wa Mkwakwani, Tanga.-Bingwa