Msuva atimukia Simba

WINGA wa Yanga, Simon Msuva, amesema kuwa baada ya kumalizika kwa mkataba wake, atafungasha virago vyake Jangwani na kutua Mtaa wa Msimbazi yalipo maskani ya Simba ili kujiepusha na lawama dhidi yake.

Mkataba wa mchezaji huyo Yanga umeelezwa kutarajiwa kumalizika mwishoni mwa msimu huu.

Akizungumza na BINGWA hivi karibuni, Msuva alisema pamoja na kuipenda Yanga, amejikuta katika wakati mgumu kutokana na shutuma dhidi yake, hasa pale anapocheza chini ya kiwango.

Alisema kuwa tangu alipotua Jangwani, amekuwa akicheza kwa uwezo wake wote ili kuisaidia timu yake, lakini anapokosea hata kwa bahati mbaya mashabiki wa timu hiyo humtukana bila sababu za msingi wakidai eti ana mapenzi na Simba.

“Siku zote nimekuwa nikijituma kadiri ya uwezo wangu kuisaidia timu yangu ya Yanga, lakini nikikosea hata kwa bahati mbaya huwa ni shida, sasa ni kheri niende kutafuta maisha kwingineko, iwe ni Simba au hata Azam kwani ninachoangalia ni masilahi,” alisema.

Msuva alisema japo katika familia yao wengi ni wapenzi wa Simba, kwa upande wake amekuwa akiitumikia Yanga kwa mapenzi yake yote kwani ndiyo klabu iliyolikuza jina lake, akitamani kupata mafanikio makubwa akiwa na klabu hiyo.

Winga huyo mwenye mbio, alijikuta akiwa katika wakati mgumu Yanga ilipocheza na Simba pale mashabiki wao walipodai kuwa alikuwa akicheza chini ya kiwango kutokana na mapenzi yake kwa Wekundu wa Msimbazi hao.

Kati ya vitu vilivyomponza mchezaji huyo, ni kitendo chake cha kukosa mabao mawili akiwa katika nafasi nzuri, ikiwamo pasi fyongo aliyotoa akiwa ndani ya sita na mpira kuokolewa na mabeki wa Simba.

Hata katika mchezo wa Kombe la Shirikisho Afrika dhidi ya Platinum ya Zimbabwe Jumapili iliyopita, Msuva alijikuta matatani akidaiwa kucheza chini ya kiwango kama ilivyokuwa Jumatano ya wiki hii walipoivaa Kagera Sugar kwenye mchezo wa Ligi Kuu Tanzania Bara.

Juu ya tishio hilo la Msuva kuondoka Jangwani, Mkuu wa Kitengo cha Habari na Mawasiliano Yanga, Jerry Muro, alisema kuwa kimsingi klabu yao imekuwa ikiwathamini mno wachezaji wake, lakini kwa yeyote anayetaka kuondoka hawatamzuia iwapo atakuwa amefuata taratibu.

“Hatuwezi kumzuia mchezaji yeyote atakayetaka kuondoka katika timu hii, Yanga imekuwapo muda mrefu na kuna wachezaji wengi wamepitia hapa na kuiacha kama ilivyokuwa,” alisema Muro, mmoja wa wasemaji matata na wenye mbwembwe nyingi wa klabu za soka hapa nchini.

Msuva ndiye mchezaji wa Yanga mwenye mabao mengi zaidi katika orodha ya wafungaji wa Ligi Kuu Bara, akiwa amecheka na nyavu mara nane, akizidiwa mabao mawili na kinara, Didier Kavumbagu.-Bingwa