Mbunge ashauri uchaguzi Serikali za mitaa

MBUNGE wa Nkasi Kaskazini, Ally Keisy Mohamed (CCM), ameitaka Serikali kufuta matokeo ya Uchaguzi wa Serikali za Mitaa sehemu zote itakapothibitika kwamba wahamiaji walishiriki kupiga kura.

Ally Keisy

Akiuliza swali bungeni jana, Keisy alisema maeneo mengi ya mipakani wahamiaji walipiga kura katika Uchaguzi wa Serikali za Mitaa.

“Kwa nini Serikali isiamuru sasa uchaguzi urudiwe katika maeneo yote ambayo wakimbizi walishiriki kupiga kura kwa kuwa wakimbizi hawa kwa kiasi kikubwa wanalindwa na maofisa uhamiaji?” alihoji Keisy.

Akijibu swali hilo, Naibu Waziri Ofisi ya Waziri Mkuu, Tawala za Mikoa na Serikali za Mitaa (TAMISEMI), Aggrey Mwanri alisema katika uchaguzi huo majina ya wagombea yalikuwa yanatangazwa mapema  kutoa fursa kwa watu kuweka  pingamizi.

“Vilevile majina ya wapiga kura yalikuwa yanabandikwa mapema hali inayowezesha mtu yeyote kupeleka pingamizi lake kupinga majina hayo,” alisema.

Awali akijibu swali la msingi la Mbunge wa  Viti Maalum, Josephine Genzabuke(CCM), Mwanri alisema endapo wapo wakimbizi waliothibitika kupiga kura katika uchaguzi wa Serikali za Mitaa kwa Mkoa wa Kigoma, Serikali ipo tayari kufanya uchunguzi juu ya madai haypo.

Hata hivyo ni jukumu la viongozi wa vijiji, vitongoji na mitaa  na wananchi kuwabaini watu ambao siyo raia au wakazi wa eneo husika na kutoa taarifa kwa mamlaka husika  hatua ziweze kuchukuliwa kwa mujibu wa sheria,” alisema.
Katika swali lake, Genzabuke alitaka kauli ya Serikali kuhusu wakimbizi waliopiga kura katika baadhi ya maeneo ya Mkoa wa Kigoma.