Yanga yatua Mbeya kibabe

BAADA ya Yanga kuifunga BDF XI ya Botswana mabao 2-0 katika mchezo wa kwanza wa raundi ya awali ya Kombe la Shirikisho Afrika Jumamosi ya wiki iliyopita, timu hiyo inaondoka Dar es Salaam kwenda Mbeya tayari kwa mechi zao dhidi ya Prisons na Mbeya City, huku wakiwa na matumaini makubwa ya kushinda.

Katika mchezo wao dhidi ya BDF XI uliopigwa kwenye Uwanja wa Taifa, Dar es Salaam, Yanga ilicheza vizuri mno na iwapo washambuliaji wake wangekuwa makini, wangevuna zaidi ya idadi hiyo ya mabao.

Ushindi wa Jumamosi unaonekana kuzidi kuwapandisha mzuka Yanga ambapo wameapa kuvamia Jiji la Mbeya kwenda kuendeleza furaha yao katika mechi mbili za Ligi Kuu Tanzania Bara zitakazopigwa Uwanja wa Sokoine Alhamisi na Jumapili.

Katika mchezo wao wa kwanza jijini humo, watamenyana na Prisons Alhamisi, kabla ya kushuka dimbani tena Jumapili kukipiga na Mbeya City.

Mechi hizo zote ni ngumu ambapo iwapo watashinda, watakuwa wamejiweka katika mazingira mazuri kwenye msimamo wa ligi hiyo, kwa sasa wakiwa wanashika nafasi ya pili nyuma ya Azam, japo timu zote hizo kila moja ina pointi 25 na mechi 13, lakini zikizidiana kwa wastani wa mabao ya kufunga na kufungwa.

Wakati huo huo, kikosi cha Yanga kinatarajia kuondoka nchini Februari 25, mwaka huu kuekelea Botswana tayari kwa mchezo wa marudiano dhidi ya BDF XI utakaopigwa kati ya Februari 27 na Machi mosi, mwaka huu.

“Mara baada ya kumaliza michezo yetu miwili ya ligi jijini Mbeya, tunatarajia kurejea Dar es Salaam Jumatatu kujiandaa na safari ya Botswana siku inayofuata,” alisema Meneja wa Yanga, Hafidh Saleh.-bingwa