Wenye ulemavu watoa masharti Uchaguzi Mkuu

CHAMA cha Walemavu Tanzania (Chawata), kimewataka wanasiasa kuandaa wakalimani katika mikutano yao ya kampeni katika Uchaguzi Mkuu unaotarajiwa kufanyika Oktoba, mwaka huu ili waweze kushiriki vyema na kufanya uamuzi wa kuchagua viongozi sahihi kwa maendeleo ya taifa.

Mwenyekiti wa walemavu  Amoni Mpanju

Mbali na hilo, pia wamewataka wanasiasa kutumia maandishi ya nukta nundu pamoja na yaliyokuzwa maalumu kwa watu wenye ulemavu wa ngozi (albino) na wale wasioona vizuri katika vitabu vya ilani zao za uchaguzi.

Hayo yalisemwa kwenye mkutano wa watu wenye ulemavu jijini Dar es Salaam jana na Mwenyekiti wa chama hicho, Amon Mpanju,  wakati wa uwasilishaji wa waraka kwa wadau wa demokrasia nchini.

Mpanju alisema lengo ni kuwa na ushiriki mpana na wenye tija kwa watu wenye ulemavu katika michakato yote ya demokrasia nchini.

Alisema wamefikia uamuzi huo baada ya kuwapo kwa ushiriki mdogo wa walemavu katika michakato ya kidemokrasia na utawala wa nchi kama raia wengine.

 “Sisi raia wa nchi hii wenye ulemavu tunataka  tuhakikishiwe kupata haki sawa katika kuchagua au kuchaguliwa kwenye ngazi zote za uchaguzi hapa nchini,” alisema Mpanju.