Wachezaji Yanga wajazwa manoti

UONGOZI wa Yanga umefikia uamuzi wa kuboresha mishahara ya wachezaji wao, kutokana na kile kinachoonekana kufurahishwa na mwenendo wa kikosi chao katika Ligi Kuu Tanzania Bara na Kombe la Shirikisho Afrika.

Yanga inashika nafasi ya pili katika msimamo wa Ligi Kuu Bara, lakini ikiwa na pointi 25 na mechi 13 sawa na vinara Azam waliopo kileleni kutokana na wastani mzuri wa mabao ya kufunga na kufungwa.

Katika michuano ya kimataifa ya Kombe la Shirikisho, timu hiyo imeanza kwa mbwembwe kwa kuichapa BDF XI ya Botswana mabao 2-0 katika mchezo wa kwanza wa raundi ya awali uliopigwa Jumamosi iliyopita kwenye Uwanja wa Taifa, Dar es Salaam.

Ukiachana na ushindi huo, moyo wa kupambana unaoonyeshwa na wachezaji wa timu hiyo, ndio hasa unaoushawishi uongozi wa Yanga kufikiria jinsi ya kuwafurahisha zaidi vijana wao waweze kufanya mambo makubwa zaidi wakiamini hilo lipo ndani ya uwezo wao.

Juu ya mpango wao huo wa kuboresha mishahara ya wachezaji, uongozi wa klabu hiyo umeona ni vema wakafanya hivyo pale wanapokunwa na kandanda au ushindi wa timu yao badala ya kuwaahidi kuwapa fedha kama ilivyokuwa awali.

Hayo yote yanaonekana kulenga katika kuwapandisha mzuka wachezaji wao waweze kupambana kadiri ya uwezo wao, ili kuisambaratisha BDF XI katika mchezo wa marudiano, lakini pia kuzipiku Azam na Simba kwenye mbio za kuwania ubingwa wa Ligi Kuu Bara.

Akizungumza na BINGWA, Katibu Mkuu wa Yanga, Jonas Tiboroha ambaye ni mtaalamu wa masuala ya ukocha na ufundi, alisema hawana sababu ya kuwaahidi fedha wachezaji pindi wanapokuwa na mechi ngumu zaidi ya kuwaboreshea posho na mishahara yao.

“Hatuna sababu ya kuwaahidi fedha kila wanapokuwa na mechi ngumu, kushinda mchezo ni sehemu ya majukumu yao, hivyo ndiyo maana utaona kuna baadhi ya vitu tumeviboresha,” alisema Tiboroha.

Alisema kila mchezaji anapaswa kuwajibika, kujituma na kujitolea kwa ajili ya timu na masilahi yake binafsi iwe ni ndani ya Yanga au kwingineko.

Hata hivyo, kiongozi huyo hakuwa tayari kuweka wazi kwamba watawaongezea mishahara wachezaji wao kwa kiasi gani na ni vigezo gani watakavyovitumia katika hilo.

Lakini BINGWA linatambua kuwa ongezeko la mishahara kwa wachezaji, litategemea na mchango wa mchezaji husika, wale watakaokuwa wakijituma na kuisaidia zaidi timu ndio watakaoneemeka zaidi.-bingwa