Traore, Wanga mdomoni mwa Simba

SIMBA wamewateka washambuliaji hatari wa mabingwa wa Sudan El-Merreikh, Mohamed Traore na Allan Wanga ambao juzi walikuwa mwiba mchungu kwa mabeki wa Azam, wakati wa mchezo wa Ligi ya Mabingwa Afrika uliochezwa Uwanja wa Azam Complex, nje kidogo ya Jiji la Dar es Salaam.

Katika mchezo huo, Azam ilishinda mabao 2-0, lakini mabeki wake, hasa Muivory Coast, Pascal Wawa, wakifanya kazi ya ziada kumdhibiti Wanga aliyecheza dakika zote 90.

Baada ya mchezo huo, Makamu wa Rais wa Simba, Geoffrey Nyange ‘Kaburu’, hakutaka kufanya kosa na kujitosa ‘mzima mzima’ kwenda kufanya mazungumzo na Wanga.

BINGWA lilimshuhudia Kaburu akizungumza na Traore na baadaye Wanga, lakini ikiwa ni baada ya kiongozi huyo kuwapongeza wawili hao kwa kazi waliyoifanya.

Simba ilishawahi kumtaja Traore kama mmoja wa wachezaji waliokuwa katika mpango wao wa usajili wa dirisha dogo la Desemba mwaka jana.

Baada ya kuzungumza na Kaburu, BINGWA lilimfuata Wanga kutaka kujua alichokuwa akiteta na bosi huyo wa Simba, ambapo alisema: “Ninafahamiana naye (Kaburu) kwani tulikutana Kenya pamoja na Zanzibar nilipokuwa na timu ya AFC Leopards katika mashindano ya Kombe la Mapinduzi mwaka jana.”

Alipoulizwa iwapo yupo tayari kutua Simba, alisema kuwa hilo linawezekana kwani mchezaji yeyote huwa anaangalia masilahi, hivyo kama Wekundu wa Msimbazi hao watakuwa tayari kumlipa kiasi anacholipwa El Merreikh, hana shida.

Gazeti hili jana lilimtafuta Kaburu kujua alichoteta na washambuliaji hao ambapo alisema: “Ni kweli nilizungumza na wachezaji wote wawili, hii si mara ya kwanza kukutana nao, kimsingi tunawahitaji kwani ni wachezaji wazuri.”

Aliongeza: “Nilisamehe kwenda Morogoro kuisapoti timu yangu ya Simba ikicheza na Polisi Moro kwa ajili ya kukutana na Traore na Wanga na kila kitu kimekwenda kama tulivyotaka.”

Alisema atakutana na wenzake akiwamo Mwenyekiti wa Kamati ya Usajili ya Simba, Zacharia Hanspoppe, kuanza mchakato wa kuwasajili wachezaji hao mwishoni mwa msimu wakiamini hakuna linaloshindikana, hasa baada ya kufahamu mustakabali wao ndani ya El Merreikh.

“Lengo letu ni kuifanya Simba kuwa tishio, hivyo tutaiimarisha zaidi safu ya ushambuliaji kwani matarajio yetu ni kushiriki michuano ya kimataifa mwakani kwani uwezo huo tunao baada ya kupanda hadi nafasi ya nne katika msimamo wa Ligi Kuu Bara,” alisema Kaburu.

Simba iliyoanza Ligi Kuu Bara kwa kusuasua, imeanza kucharuka na kuchupa kutoka nafasi ya tisa hadi ya nne, ikiwa na pointi 20, nyuma ya vinara Azam na Yanga.-bingwa