Nabii atabiri machafuko nchini

Nicolaus Suguye

NABII Nicolaus Suguye wa Kanisa la The Word of Reconciliation Ministries (WRM) iliyopo Matembele ya Pili jijini Dar es Salaam, ametabiri nchi kuingia kwenye machafuko kutokana na uvamizi wa maadui kutoka nje ya nchi ambao watasababisha baadhi ya Watanzania kupoteza maisha kutokana na mapigano yatakayozuka.

Kauli hiyo aliitoa mwishoni mwa wiki iliyopita wakati wa ibada kanisani hapo na kuwataka waumini wote kuingia kwenye maombi ya kufunga na kuomba ili kunusuru hali hiyo isijitokeze na kusababisha Watanzania kuishi maisha ya wasiwasi, ambayo hawajayazoea tangu nchi hii ipate uhuru wake mwaka 1961.

“Nimeona maputo baharini yanatoka pande nne za dunia kuja nchi kavu na yalikuwa yanamwaga sumu kali na kila aliyekuwa anagusa alikufa na wengine walikatika viungo vyao na wengine walikimbia ovyo kwa lengo la kutaka kuokoa maisha yao.

“Hii ina maana kuna hali ya machafuko ambayo yataipata nchi hii, hivyo tunatakiwa kusimama kwenye maombi kwa ajili ya kubatilisha hali hiyo,” alisema Nabii huyo.

Katika maombi ya siku saba, Nabii Suguye aliwataka waumini hao kuyaombea majeshi yote ya Tanzania pamoja na viongozi wake, ili Mungu awape macho ya kuona hali ya hatari iliyo mbele yao na kuwapa maarifa ya kubaini wapi maadui walipojificha kwenye mipaka ya nchi.

Mtumishi huyo wa Mungu aliwataka Watanzania wote bila kujali itikadi za siasa, kuendelea kuombea hali hiyo isijitokeze na siku zote maombi huombwa wakati wa amani badala ya kusubiri machafuko yajitokeze ndipo watu waanze kufanya hivyo na watakuwa wamechelewa.-MTANZANIA