Dawa zilizopigwa marufuku zauzwa Dar

BAADHI ya maduka Jijini Dar es saalam  yanaendelea kuuza dawa zilizofutiwa usajili  na Mamlaka ya Chakula  na Dawa Tanzania (TFDA)  baada ya kubaini zina madhara kwa binadamu.

Mamlaka hiyo ilifuta usajili kwa aina tano za dawa ya vidonge ya kutibu fangasi kasuli(ketoconazole), dawa ya kutibu malaria ya maji na vidonge Amodiaquine (monotherapy).

Dawa nyingine zilizofutiwa usajili na kupigwa marufuku kuuzwa madukani ni pamoja na ya kutibu mafua na kikohozi ya maji na ile ya vidonge pamoja na kapsuli zenye kiambato hai (phenypropanl amine).

Dawa nyingine ni ile ya kuua bacteria ya sindano (chloramphenicol sodium) na dawa ya kuua bacteria ya maji pamoja na kapsuli(Cloxacillin).

MTANZANIA ilitembelea baadhi ya maduka ya dawa maeneo ya Mabibo, katikati ya jiji, Ubungo Maziwa na Mwenge na kukuta dawa hizo zikiendea kuuzwa.

Akizungumza hali hiyo jana, Ofisa Habari wa TFDA, Gaudensia Simwanzi alisema kwa sasa wataalamu wa mamlaka hiyo wapo katika ukaguzi unaofanyika sehemu mbalimbali nchini.

Alisema kuna mtandao unaoendelea kufanya ukaguzi sokoni kwa sababu baadhi ya wafanya biashara sio waaminifu kwani wanaendelea kuuza dawa hizo

“Dawa ya SP iliyo kuwa ya malaria  imebadilishiwa matumizi sasa inatumika kama kinga ya malaria kwa wajawazito tu, dawa hii inatakiwa kupatikana hospitali na zahanati tu, hivyo kwenye maduka ya dawa hazitakiwi kuwemo kuanzia sasa.

“Tunawahakikishia watumiaji hakutokuwapo tena na dawa hizo sokoni tupo kwenye ukaguzi,”alisema Simwanzi.-Mtanzania