Yanga yatinga makaburini

KIKOSI cha Yanga kinachonolewa na Mholanzi Hans van der Pluijm kimehamishia kambi katika Chuo cha Uvuvi Mbegani, Bagamoyo, ambapo pamoja na mambo mengine, kitatembelea vivutio vya kitalii, yakiwamo makaburi ya masharifu yaliyopo Kaole, wilayani humo.

Awali Yanga walikuwa wameweka kambi katika Hoteli ya Kiromo, iliyopo Bagamoyo, kujiandaa na mchezo wao wa Ligi Kuu Tanzania Bara dhidi ya Polisi Morogoro, uliochezwa Jumamosi iliyopita kwenye Uwanja wa Jamhuri, Morogoro ambapo Wanajangwani hao walishinda bao 1-0.

Na kwa sasa timu hiyo ikijiandaa kuivaa Ndanda FC ya Mtwara Jumapili hii kwenye Uwanja wa Taifa, Dar es Salaam, benchi la ufundi la Yanga limeona ni vema kujichimbia Mbegani, eneo ambalo ni tulivu linalowawezesha wachezaji kushika maelekezo ya makocha wao kwa ufanisi wa hali ya juu.

Lakini pia, kitendo cha wachezaji kutembelea eneo la Kaole kujionea vivutio vya kitalii vya huko, yakiwamo makaburi ya masharifu, ni njia mojawapo ya kuwajenga kisaikolojia.

Wakiwa katika makaburi hayo ya Kaole, wachezaji hao watapata fursa ya kuliona kaburi la Wapendanao waliozikwa pamoja na lile la Sharifu ambalo hutumika kwa ajili ya kuomba dua kupata baraka kuelekea michezo yao ijayo.

Bagamoyo ni miongoni mwa miji maarufu ya kihistoria ambapo enzi za utumwa, wafanyabiashara wa Kiarabu na kizungu waliutumia kupitisha biashara zao.

Habari kutoka ndani ya Yanga zinasema kuwa sababu ya kambi kuhamishiwa Mbegani kutoka Kiromo Hotel, pamoja na mambo mengine ni kukwepa hujuma zozote zinazoweza kufanywa na wapinzani wao kupitia nyota wao.

Chanzo kutoka ndani ya kambi hiyo kimesema kuwa benchi la ufundi limeona Mbegani ni eneo salama na tulivu zaidi kwa wachezaji wao kujifunza mambo mbalimbali kutoka kwa makocha wao.

“Unajua kwa sasa inaonekana hakuna timu inayopenda kuona mpinzani wake anashinda, hivyo tumeona ni vema tukaweka kambi Mbegani na kutembelea eneo la Kaole kama sehemu ya kuwajenga zaidi wachezaji wetu kuelekea mechi zetu zijazo,” alisema mtoa habari huyo.

Akizungumza na BINGWA, Meneja wa Yanga, Afidh Saleh, alikiri timu yao kukimbilia Mbegani, lakini pia akiweka wazi juu ya wazo la kutembelea eneo la Kaole ili kutoa fursa kwa wachezaji kujionea mambo mbalimbali ya kihistoria.

“Ni wazo zuri (kwenda kutembelea vivutio vya kitalii vya Kaole), ...tutakwenda huko bila shaka,” alisema Saleh.

Mbali ya mechi za Ligi Kuu Bara, Yanga pia inakabiliwa na kibarua cha michuano ya Kombe la Shirikisho Afrika, ikiwa imepangwa kuanza na BDF XI ya Botswana ambapo mchezo wa kwanza utapigwa kati ya Februari 13 na 15, mwaka huu kwenye Uwanja wa Taifa, Dar es Salaam.

Kutokana na kukabiliwa na michezo hiyo ya ligi na ya kimataifa, Yanga wamekuwa wakijinoa vilivyo kuhakikisha wanafanya vizuri.

Jana kikosi hicho kilifanya mazoezi kwenye Uwanja wa Chuo cha Uvuvi Mbegani tayari kabisa kuwavaa Ndanda FC, huku wachezaji wote wakiwa na ari kubwa ya kuibuka na ushindi.

Baada ya mchezo huo wa Jumapili, Yanga watashuka tena dimbani Jumatano ijayo kwenye Uwanja wa Mkwakwani, Tanga kuivaa Coastal Union ya huko.-bingwa