Simba wataka mkutano mkuu

WANACHAMA wa Simba kutoka matawi mbalimbali nchini, wameujia juu uongozi wao na kutaka kuitishwa kwa mkutano mkuu ili kujadili mambo mbalimbali yanayowakabili kwa sasa, ikiwa ni pamoja na mwenendo usioridhisha wa timu yao katika Ligi Kuu Tanzania Bara.

Wanachama hao waliowakilishwa nakatibu msaidizi wa matawi ya Simba, Wilaya ya Temeke, Ally Bane, alisema anahitaji mkutano wa dharura ili waweze kujadili mustakabali wa timu, kwani kunaonekana kuwapo kwa mpasuko ndani ya viongozi wa klabu hiyo.

Alisema kama mkutano huo hautafanyika, watasusia kwenda uwanjani kutokana na mwenendo wa matokeo mabaya ya timu hiyo.

“Mkutano ndio utakuwa suluhisho, la sivyo hatuna haja ya kwenda uwanjani na matokeo haya ambayo kikosi chetu yanapata, tumechoka kila siku sisi tu,”alisema.

Naye Mwenyekiti wa matawi ya Simba Mkoa wa Tanga, Mbwana Msumari, alimtaka Rais wa timu hiyo, Evans  Aveva kurudisha umoja kwenye klabu hiyo.

“Hapa umoja ukirudi timu itaweza kufanya vema la sivyo msimu huu tutashuka daraja tusipoangalia, Aveva anatakiwa atuokoe,”alisema.

BINGWA lilimtafuta Katibu Mkuu wa timu hiyo, Stephano Ali,ambaye alisema wanapambana kuweka mambo sawa.-bingwa