Ndemla ahusishwa kipigo Simba

KOCHA Mkuu wa Simba, Mserbia Goran Kopunovic, amekiri kuwa kukosekana kwa kiungo wake Said Ndemla na mshambuliaji Emmanuel Okwi kumechangia timu yake kufungwa mabao 2-1 na Mbeya City katika mchezo wa Ligi Kuu Tanzania Bara uliopigwa juzi kwenye Uwanja wa Taifa, Dar es Salaam.

Ndemla aliukosa mchezo huo kutokana na kuumia nyama za paja, wakati Okwi akiwa ni majeruhi baada ya kugongwa kichwani na beki wa Azam, Aggrey Morris na kupoteza fahamu katika mechi baina ya timu hizo iliyopigwa mwishoni mwa wiki iliyopita.

Akizungumza baada ya mechi ya juzi, Goran alisema katika kikosi chake kulikuwa na pengo kubwa kwa kukosekana wachezaji hao na kwamba anapokuwa Ndemla katika kikosi chake, anakuwa na msaada mkubwa hasa kwenye kusaidia mashambulizi.

Alisema kuwa alilazimika kumtoa Danny Sserunkuma na nafasi yake kuchukuliwa na Elius Maguli kwa kuwa Mganda huyo alionekana kuchoka kwa kile alichodai kucheza mechi nyingi mfululizo kuanzia michuano ya Kombe la Mapinduzi Zanzibar hadi ya Ligi Kuu Bara.

Goran alisema tatizo lingine ambalo huwa linagharimu timu hiyo na hali nzima ya wachezaji wake kutokuwa na pumzi za kutosha na hivyo kushindwa kuhimili dakika zote 90.

“Kikosi kimekosa uimara, hasa kwa wachezaji kuonekana kuchoka mapema kabla ya dakika 90, lakini pia kukosekana kwa Okwi na Ndemla kuliigharimu timu kwani mara kadhaa akiwepo Ndemla huwa anasaidia sana kupeleka mashambulizi mbele,” alisema.

Tayari Ndemla na Okwi wameanza mazoezi mepesi na iwapo hali zao zitaimarika, huenda wakajumuika na wenzao katika mechi zijazo japo uwezekano wa kucheza kesho dhidi ya JKT Ruvu kwenye Uwanja wa Taifa ni mdogo-Bingwa