Goran: Mbeya City wangetufunga mengi

KOCHA Mkuu wa Simba, Goran Kopunovic, ameibuka na kali kwa kusema iwapo wapinzani wao Mbeya City wangekuwa vizuri wangeibuka na ushindi mnono zaidi ya ule wa mabao 2-1 waliopata kwenye Uwanja wa Taifa, Dar es Salaam juzi.

Goran amejikuta akiyasema hayo mara baada ya kipigo hicho walichokipata ambacho ni cha pili katika mfululizo wa Ligi Kuu Tanzania Bara, wakiwa wameshinda mbili na sare sita.

Akizungumzia mchezo huo, Goran alisema Mbeya City walikuwa wazuri zaidi yaokuanzia viungo tofauti na wachezaji wake ambao walionekana kuishiwa pumzi kipindi cha pili.

“Viungo wa Mbeya City walifanya kazi ya ziada kutupoteza na hata safu yao ya ulinzi ilikuwa vizuri tofauti na sisi, ndio maana nasema wangekuwa vizuri wangetufunga mengi kuliko haya,”alisema.

Kocha huyo ambaye tayari ameonyesha kukata tamaa kutokana na mwenendo wa kikosi chake, amesema hana la kufanya kwa sasa kwenye kikosi hicho kwa kuwa matumaini yake yamefutika.

“Nikimtoa mtu najua anayeingia anaweza kubadilisha mpira,lakini unakuta mambo yanakuwa tofauti na ulivyofikiria, sijui hata la kufanya kwa sasa,”alisema.

Goran amechukua mikoba ya Patrick Phiri aliyetimuliwa ambapo mpaka sasa ameshinda mechi mbili dhidi ya Ruvu Shooting naNdanda kwenye mechi za Ligi Kuu Bara.

Wekundu wa Msimbazi kwa sasa wanashika nafasi ya 11 katika msimamo wa Ligi Kuu Bara, wakiwa na pointi 13 kutokana na mechi 10.-bingwa