Wachezaji Simba wajazwa mamilioni

BAADA ya kuilaza Yanga mabao 2-0 kwenye mechi ya Nani Mtani Jembe, uongozi wa Simba umewapa wachezaji wao motisha ya fedha kama shukrani kwa kufanikiwa ushindi huo.

Simba ilizawadiwa zaidi ya Sh milioni 90 na waratibu wa pambano hilo, Kampuni ya Bia Tanzania (TBL), kufuatia ushindi huo.

Kiasi hicho cha fedha ilichopata Simba  kinajumuisha Sh milioni 15 kwa kuibuka mshindi wa pambano hilo na Sh milioni 77 za kura za mashabiki.

Mpinzani wake Yanga alizawadiwa jumla ya Sh milioni 7, kati ya hizo Sh milioni 5 ni kifuta jasho baada ya kupoteza mchezo huo na Sh milioni 2 za kura za mashabiki.

Chanzo cha kuaminika kutoka ndani ya Simba kilisema kuwa wachezaji wote wa timu hiyo wamevuna fedha kufuatia ushindi dhidi ya Yanga.

“Wachezaji waliocheza kila mmoja amepewa Sh milioni mbili, wakati wale waliovaa jezi lakini hawakucheza kila mtu ameondoka na Sh milioni moja.

“Kuna wale ambao hawakucheza kabisa wala kuvaa jezi, hawa kila mmoja amepata Sh 600,000 kama motisha ya kushinda mechi ya Nani Mtani Jembe,” kilisema chanzo hicho.

Msemaji wa Simba, Humphrey Nyasio, alipoulizwa kuhusiana na taarifa hizo za kuwajaza manoti wachezaji wao alikiri kuwapo kwa jambo hilo lakini hakutaka kuweka wazi kiasi cha fedha ambazo wachezaji wa timu hiyo wamepewa.

“Ni jambo la kawaida kuwapongeza wachezaji pale timu inapofanya vizuri lakini siwezi kusema ni kiasi gani ili kuepushia usumbufu wachezaji.”-Hisani ya Bingwa