Umeisikia hii ya Bomu kumuua aliyetaka kuua polisi Songea

MTU mmoja amefariki dunia papo hapo baada ya bomu alilotaka kuwarushia askari waliokuwa doria ya Sikukuu ya Krismasi katika Mtaa wa Kotazi uliopo Kata ya Majengo, Manispaa ya Songea, kumlipukia.

Kutokana na tukio hilo lililotokea usiku wa kuamkia jana, Jeshi la Polisi Mkoa wa Ruvuma kwa kushirikiana na makachero kutoka makao makuu ya jeshi hilo yaliyopo Dar es Salaam, wanawasaka watu watatu walioshirikiana na mlipuaji huyo ambaye bomu hilo lilimshinda na kumlipukia huku utumbo wake ukitoka nje na mkono wake wa  kushoto umekatika na vipande vyake havijulikani vilipo.

Akizungumza mjini hapa jana katika ukumbi wa mikutano wa jeshi hilo, Kaimu Mkurugenzi wa Makosa ya Jinai (DCI), Diwani Athumani, alisema tukio hilo lilitokea saa saba usiku wakati askari wakiwa doria.

Alisema wakati doria inaendelea katika eneo hilo, kulitokea mlipuko wa bomu lililotengenezwa kienyeji na kuwajeruhi askari wawili.

Aliwataja askari waliojeruhiwa kuwa ni PC Mselemu mwenye namba G 7903, ambaye alijeruhiwa mkono wake wa kushoto na alitibiwa na kuruhusiwa na mwingine ni PC Mariam mwenye namba WP. 8616, naye alijeruhiwa bega la mkono wa kushoto na amelazwa katika Hospitali ya Mkoa Ruvuma akiendelea kupata matibabu.

Alisema timu ya makachero watahakikisha watuhumiwa watatu waliohusika na tukio hilo wanakamtwa kwa kufuatilia mtandao wao wa uhalifu, kwa kuwa vitendo vya ulipuaji wa mabomu vimekithiri nchini, ikiwemo Ruvuma kwa kuwa hadi sasa ni tukio la tatu kwa mwaka huu.

Alisema wahalifu hao watakamatwa kutokana na tukio hilo kwa sababu baada ya mwenzao kulipuliwa na bomu hilo, walijaribu kutorosha mwili wake ili kupoteza ushahidi lakini ilishindikana baada ya askari wengine waliokuwa doria kuwahi eneo la tukio na wao wakaamua kukimbia kusikojulikana.

“Wahalifu hao waliuvuta mwili wa mwenzao kutoka katika eneo la tukio kwa umbali wa mita zisizopungua 80 na 90 kwa lengo la kutaka kupoteza ushahidi, lakini waliwahiwa na askari wengine wa doria na kuuacha mwili na kutokomea kusikojulikana,” alisema Athumani.

Kwa upande wake, Mkuu wa Mkoa wa Ruvuma, Said Mwambungu, aliyetembelea eneo la tukio alisema wahalifu hao wanaishi katika jamii inayotuzunguka, hivyo ni vyema kila mmoja akaliona tukio hilo kwa umuhimu wake na kuwafichua waliofanya ili Ruvuma iendelee kuwa na amani kwa kuwa inaleta taharuki na kurudisha nyuma shughuli za maendeleo.

Naye, Mganga Mkuu Mfawidhi Hospitali ya Mkoa wa Ruvuma, Dk. Benedkto Ngaiza, amethibitisha kupokea mwili mmoja wa mtu aliyefariki huku utumbo ukiwa umetoka nje na majeruhi wawili ambao ni askari.-Mtanzanuia limeripoti