Polisi wapokea msaada wa kompyuta

ASKOFU wa Kanisa la Anglikana Dayosisi ya Tarime, Dk. Mwita Akiri, ametoa msaada wa kompyuta pamoja na mashine ya kudurufu kwa Jeshi la Polisi kitengo cha Dawati la Polisi la jinsia kwa ajili ya kusaidia utunzaji wa takwimu na ukatili na kuratibu masuala mbalimbali.ASKOFU wa Kanisa la Anglikana Dayosisi ya Tarime, Dk. Mwita Akiri

Akikabidhi msaada huo wenye thamani ya Sh milioni 1.2, Askofu Akiri alisema vifaa hivyo vimetolewa kwa ajili ya kuimarisha jitihada za jeshi hilo katika kukomesha vitendo vya ukeketaji watoto wa kike unaoendelea wilayani Tarime.

Alisema kama viongozi wa kanisa wanaamini kuwa mila ya kukeketa huathiri afya na maumbile ya watoto wa kike ambao ni watoto wa Mungu na inapaswa kukomeshwa hivyo kuwashauri wazee wa mila kusaidia kuzuia mila hiyo.

Makabidhiano hayo yamefanyika jana Kituo cha Polisi wilayani Tarime na kupokelewa na Kaimu Mkuu wa Kituo cha Wilaya ya Tarime, Issa Bukuku mbele ya Kaimu Mkuu wa Wilaya, Jonathan Machango pamoja na Kamanda wa Polisi wa Mkoa wa kipolisi wa Tarime na Rorya, Lazaro Mambosasa.

Kwa upande wake Kamanda wa Kanda Maalumu, Mambosasa alishukuru kupatikana kwa masada huo na kuongeza kuwa vifaa hivyo vitasaidia Jeshi la Polisi kwa ujumla kuboresha huduma zake ikiwa ni pamoja na utunzaji wa kumbukumbu.

Naye Kaimu Mkuu wa Wilaya, Jonathan Machango, ambaye pia ni Ofisa Tarafa Mkuu alisema kuwa vifaa hivyo vitumike vyema na kutekeleza majukumu kama ilivyo kusudiwa.-mtanzania