Mwanamke achoma moto nyumba ya mumewe

MKAZI wa Kijiji cha Majengo, Kata ya Koryo Wilaya ya Rorya Mkoa wa Mara, Vaileth Ogola, anatafutwa na polisi kwa tuhuma za kuhusika na tukio la kuchoma nyumba ya mumewe moto na kuteketeza mali zilizokuwamo.

Akizungumzia tukio hilo, Kamanda wa Polisi Mkoa wa kipolisi wa Tarime na Rorya, Lazaro Mambosasa, alisema kuwa tukio hilo lilitokea Desemba 23 mwaka huu saa mbili usiku mara baada ya kutokea ugomvi baina yake na mumewe.

“Tukio hili linadaiwa kuwa chanzo chake ni ugomvi uliosabaishwa na wivu wa kimapenzi baina ya mtuhumiwa na mumewe, Kinyatta Kibindi, lakini baada ya kufanikiwa kuichoma moto nyumba hiyo alitoroka na kwenda ambako hakujajulikana na hivyo Jeshi la Polisi linamsaka,” alisema.

Hata hivyo, Kamanda alisema kuwa mumewe Kibindi ni mkazi wa Dar es Salaam na alikuwa ameenda kijijini hapo kwa nia ya kusherehekea sikukuu ya Krismasi na mwaka mpya lakini sasa hana makazi ya kuishi yeye pamoja na wapangaji saba waliokuwa wakiishi katika nyumba hiyo.

“Thamani ya mali iliyoteketea ndani ya nyumba hiyo ikiwa ni pamoja na zile za wapangaji saba bado haijajulikana hadi sasa, mtuhumiwa akikamatwa atafikishwa mahakamani kwa ajili ya kujibu tuhuma zinazomkabili,” alisema.