Mbaroni kwa kukutwa na meno ya tembo

JESHI la Mkoa wa Katavi linawashikilia watu wawili kwa tuhuma za kukutwa na meno ya tembo vipande 22 vya uzito wa kilogramu 46 yenye thamani ya Sh milioni 157.5.

Imeelezwa kutokana na uzito huo, imebainika ni sawa na tembo saba  waliouawa wakati wakiwa wanataka  kuyasafirisha kwenye basi kutoka Mpanda kuelekea mkoani Kigoma.

Kaimu Kamanda wa Jeshi la Polisi wa Mkoa wa Katavi, Rashid Mohamed, aliwataja watuhumiwa hao  waliokamatwa kuwa ni Justine Baluti (Zolros) (39) mkazi wa Kijiji cha  Ivungwe makazi ya wakimbizi ya Katumba Wilaya ya Mlele na  Bobifaphace Hoza (40) mkazi wa Kalele  Wilaya ya Kasulu Mkoa wa Kigoma.

Alisema watuhumiwa hao wote wawili walikamatwa jana saa 12 wakiwa katika harakati za kusafirisha meno hayo katika Stendi ya mabasi ya Mpanda.

“Siku hiyo ya tukio majira hayo ya saa kumi 12 asubuhi, askari polisi walikuwa doria kwenye eneo la stendi ya mabasi ya Mpanda yaendayo mikoani, walimtilia shaka mtuhumiwa Justine Baluti  aliyekuwa anapakia mizigo yake kwenye basi la Kampuni ya Adventure lenye namba za usajili  T.992 BUT lililokuwa likielekea mkoani Kigoma.

“Baada ya polisi kumtilia mashaka mtuhumiwa huyo na yeye alipowaona polisi kwenye eneo hilo alitaka kutoroka, hata hivyo walifanikiwa kumweka chini ya ulinzi.

“Ulianza upekuzi katika mizigo yake na kumkuta akiwa na meno ya tembo  vipande 15 yenye uzito wa kilogramu 33  vyenye thamani ya shilingi milioni  90,” alisema Kaimu Kamanda Mohamed.-mtanzania