Serikali yatakiwa kudhibiti ulevi Kilimanjaro

SERIKALI imetakiwa kuingilia kati tatizo la ulevi wilayani Rombo, mkoani Kilimanjaro, kwa kuwa ulevi huo unachangia ongezeko la watoto yatima na wanaoishi katika mazingira magumu.

Rai hiyoimetolewa leo na Mwenyekiti wa asasi ya jinsia na maendeleo wilayani Rombo (AJIMARO) Athony Massawe, wakati akikabidhi msaada wa chakula kwa watoto yatima na wale wenye maambukizi ya ugonjwa wa Ukimwi katika Kituo  cha Kulelea Watoto kiitwacho Cornel Ngaleku cha wilayani hapa.

“Tatizo la ulevi kwa wananchi wilayani hapa, linakua siku hadi siku na ni vema Serikali ikaingilia kati na kulidhibiti, kwani limechangia maambukizi ya ugonjwa wa Ukimwi na kusababisha ongezeko la watoto yatima na wale waishio katika mazingira magumu.

“Tatizo hili pia limechangia kiwango cha umasikini kuongezeka kwa wananchi, kwani vijana wengi ambao ndio nguvu kazi ya taifa, wameathiriwa na pombe na wamesahau kufanya kazi kwa ajili ya kujiletea maendeleo.

“Kutokana na tatizo hilo, alisema asasi yake imejikita katika utoaji wa  elimu kwa wananchi juu ya athari za ulevi, ikiwa ni pamoja na namna ya kujikinga na maambukizi ya ugonjwa wa Ukimwi ili kunusuru jamii hiyo,” amesema Masawe.

Katika hatua nyingine, Massawe aliitaka jamii na taasisi mbalimbali nchini zione umuhimu wa  kuwasaidia yatima na wale waishio katika mazingira magumu, kwani wamekuwa wakikabiliwa na changamoto mbalimbali, ikiwemo ukosefu wa chakula.
 

“Tumetoa msaada wa chakula kwa watoto hawa kwa kuwa tunatambua changamoto zinazowakabili. Kwa hiyo, natoa wito kwa jamii na taasisi zote nchini zitenge muda wa kuwatembelea na kutoa misaada mbalimbali kwa yatima, kwani nao wanahitaji kusaidiwa,”.

Awali akizungumza wakati akikabidhiwa msaada wa chakula hicho, Sista Ritha Massawe alisema kituo hicho kinakabiliwa na changamoto mbalimbali, ikiwamo ukosefu wa chakula.