Mama atelekeza watoto wake

JESHI la Polisi Mkoa wa Kipolisi Temeke linamshikilia mkazi wa Mbagala Kwa Azizi Ally, Mariam Issa, kwa kosa la kutelekeza watoto wake watatu katika kituo cha  Masista Kurasini, kinachomilikiwa na Kanisa Katoliki mjini  Dar es Salam.

Kaimu Kamanda wa Polisi Mkoa wa Temeke, Sabastian Zacharia, alisema mtuhumiwa alikamatwa juzi katika eneo la Kwa Azizi Ally, katika nyumba aliyokuwa akiishi.

Alisema taarifa za awali zilizofikishwa kituoni hapo na Masista wa kituo hicho, zilieleza kuwa mama huyo alifika katika kituo hicho  akiwa na wawoto wake kwa lengo la kuomba msaada ili aweze kusaidiwa kulelewa.

Alisema mtuhumiwa huyo aliondoka kimyakimya na kuwaacha watoto watatu, akiwamo wa kike mmoja na kutokomea kusikojulikana.

 “Watoto hawa ni wadogo, mkubwa ana umri wa miaka mitatu na nusu, wa pili ana miaka miwili na nusu na wa mwisho ana mwaka mmoja na nusu.

“Watoto hao baada ya kutelekezwa na mama yao masista wa kituo hicho waliripoti katika kituo chetu cha Polisi hapa Chang’ombe na tuliwapeleka Ustawi wa Jamii huku tukiendelea na msako mkali wa kumtafuta mtuhumiwa.

“Tulimkamata mtuhumiwa jana akiwa katika harakati ya kuhamisha vitu vyake vilivyokuwepo katika chumba alichokuwa akiishi na kumfikisha kituoni,” alisema Zacharia.

Alisema uchunguzi wa awali, ulibaini Mariamu alikuwa akidaiwa kodi katika nyumba aliyokuwa akiishi na mzazi mwenzake ambaye  alimkimbia akiwa na ujauzito-Mtanzania