Chama chamfukuza Rais

Guys Scott

CHAMA tawala cha nchini Zambia cha Patriotic Front (PF) kimemfuta uanachama Rais wa mpito wa nchi hiyo, Guys Scott, kwa madai ya kuvunja taratibu za kikatiba.

Kiongozi huyo aliyepewa jukumu la kuiongoza nchi hiyo baada ya kifo cha Rais Michael Sata, anahusishwa na uvunjaji wa taratibu mbalimbali za chama hicho, ikiwa ni pamoja na kufukuza ovyo wafanyakazi.

Taarifa iliyotolewa na Msemaji wa PF, Malozo Sichone, ilieleza Rais Scott amekuwa na tabia ya kuajiri na kufukuza viongozi katika muda mfupi aliokaa katika uongozi wake.

“Scott amekuwa na tabia ya kuajiri na kuwafukuza watu kazi ovyo bila ya kushauriana na Kamati Kuu ya chama,” alisema Sichone.

Alisema licha ya kutimuliwa ndani ya chama, lakini ataendelea kuwa mwanachama wa chama hicho katika kipindi cha mpito cha urais wake hadi Januari 20, 2015, baada ya kumalizika kwa uchaguzi mkuu.

Rais Scott hataweza kuwania kiti hicho kupitia PF kutokana na kukosa sifa inayomtaka kuwa na wazazi wazawa wa nchi hiyo.

Kutokana na tabia ya Scott, kumetokea makundi ya waandamanaji katika barabara za Lusaka.

Scott amekosa uungwaji mkono na wanachama wa chama hicho, huku wakimuunga mkono Edgar Lungu, aliyekuwa akikaimu nafasi hiyo wakati Sata alipokuwa hospitali mjini London.

Scott, ambaye wazazi wake ni Waingereza, ameweka historia kwa kuwa Mzungu wa kwanza kushikilia nafasi hiyo baada ya nchi zote za Afrika kupata uhuru.