Bahrain kuwachukulia hatua waliosusia uchaguzi

Waziri wa Sheria wa Bahrain ametaka watu wote waliokataa kushiriki kwenye uchaguzi wa Bunge uliofanyika hivi karibuni nchini humo kuchukuliwa hatua kali za kisheria.Khalid bin Ali Aal Khalif

Khalid bin Ali Aal Khalifa ameyasema hayo mbele ya kikao cha baraza la mawaziri kilichofanyika mjini Manama. Pendekezo hilo la Waziri wa Sheria wa Bahrain la kuchukuliwa hatua wale wote waliokataa na kususia uchaguzi wa Bunge, tayari limewasilishwa mbele ya kamati ya sheria ya baraza la mawaziri. Imeelezwa kuwa, duru ya kwanza ya uchaguzi wa Bunge wa kimaonyesho iliyofanyika siku ya Jumamosi iliyopita nchini Bahrain, iliwashirikisha watu laki tatu na elfu hamsini. Duru ya pili ya uchaguzi huo, imepangwa kufanyika Jumamosi ijayo. Serikali ya Bahrain ilitangaza kwamba asilimia 51.5. ya watu waliotimiza masharti ya kupiga kura walishiriki kwenye uchaguzi huo, ilhali, chama kikuu cha upinzani cha al Wifaq nchini Bahrain kilitangaza kuwa, karibu asilimia 30 tu ya watu ndiyo iliyoshiriki kwenye uchaguzi huo wa kimaonesho na wengi wao wakiwa ni wanajeshi na wafanyakazi wa serikali. Inafaa kuashiria hapa kuwa, tokea mwezi Februari mwaka 2011, nchi hiyo ya Kiarabu imegubikwa na maandamano ya wananchi wanaotaka mfumo wa kidemokrasia sanjari na kuondoshwa madarakani utawala wa kifalme wa Aal Khalifa.