Mtoto wa ajabu azaliwa Dodoma

KATIKA hali isiyo ya kawaida, mkazi wa Kijiji cha Chibwechangula wilayani Mpwapwa, Ruth Matonya (26) amejifungua mtoto wa ajabu. Mtoto huyo, aliyekuwa na kichwa nusu na sura inayofanana na chura, alifariki dunia muda mfupi baada kuzaliwa. Ruth alijifungua Desemba 2, mwaka huu katika kituo cha afya cha Mtakatifu Luka kinachomilikiwa na Kanisa la Anglikana Dayosisi ya Mpwapwa. Akizungumzia tukio hilo, Mganga Mfawidhi wa kituo hicho, Dk. Edwin Kihura, alisema mama huyo aliwasili kituoni hapo akiwa na uchungu mkali. “Baada ya uchungu kuendelea, hakufanikiwa kujifungua mwenyewe, tuliamua kumfanyia upasuaji ili kuweza kuokoa maisha yake. “Mama huyo alikuwa akihudhuria kliniki, lakini alipokuja miezi ya mwisho tulikuwa hatupati mkao wa mtoto na mapigo yalikuwa hayapatikani kabisa, mtoto alikuwa anacheza tumboni kitu ambacho kilikuwa kikitushangaza,” alisema Dk. Kihura. Alisema baada ya kumfanyia upasuaji, walimtoa mtoto wa jinsia ya kike ambaye alikuwa na sura isiyoeleweka. “Kichwa kilikuwa nusu, sura yake ilikuwa inafanana na sura ya chura, ingawa viungo vyote vilikuwa safi kama binadamu wa kawaida,” alisema Dk. Kihura. Alisema hali hiyo inawezekana imesababishwa na mambo mbalimbali, yakiwamo baadhi ya kinamama kukosa madini joto mwilini. Dk. Kihura alisema kukosekana kwa madini hayo huathiri uumbaji wa mtoto kwa kuwa husababisha kushindwa kugawanyika kwa kromozome. Alisema tatizo kama hilo, huwa linatokea mara chache mno katika hospitali nyingi, ingawa siku za hivi karibu matukio ya aina hiyo yameanza kuongezeka. “Tatizo kama hili kitaalamu linajulikana kama Anecephaly, wapo pia baadhi ya kinamama wanaotumia dawa za kienyeji mimba zikiwa changa, dawa hizi ni kali na nyingine ni sumu kwa viumbe vichanga tumboni,” -Mtanzania